FUE MA LE TO’OTO’O – O MEA TOTINO O LE LAUGA SAMOA.

 

  1. O le igoa o le To’oto’o Lauga – “Atipouniu.”
  2. O le igoa o le Fue – “Fetalaiga Lauga.”
  3. Fa’aaogaina ole “To’oto’o Lauga”.
  • Fa’aaoga le to’oto’o lauga i malae(fafo).
  • Mana le lauga – o lona uiga, tu’u i lalo le i’u ole to’oto’o i le va ole vaematua ma le tamaivae
  • U’u mau le ulu ole to’oto’o e lou lima tauagavale.
  • Fua lelei le mea ete u’u ai le ‘au ma lou fofoga(gutu).
  • E fa’afa ona tu’u i luma o le to’oto’o aua e fa vaega o le lauga.

 

  1. O le fa’aaogaina o le Fue i fale ma malae.
  • Lauga i fale e le fa’aaogaina  le to’oto’o na’o le fue.  O le lauga o le fue
  • Lauga i fale e faafa ona lafo o le fue i luga o tau’au,  amata mai i le tau’au tauagavale

E faafa ona  lafo ile taga e tasi ma lafo fa’ata’oto i lalo i luma o le tulafale.

  • I le fa’aaogaina i malae(fafo) fa’atasi  male to’oto’o,  o le fue e tietie ile tau’au taumatau.
  • Lauga i fafo e ta fa’afa  le fue e le lima taumatau,  amata i le tau’au tauagavale.
  • E fa’afa  ona ta i le taga e tasi, e amata i le tau’au tauagavale ae fa’ai’u i le tau’au taumatau ma fa’ati’eti’e ai.   A ma’ea,  ona amata loa lea o le lauga.

5.Tapu.

  • E ave’ese muamua lou sei ma lau fa’asolo(ula) a’o  le’i  faia le lauga.
  • Aua ete lamu pulu pe ‘ai lole a’o e lauga.
  • Tu’u  lou temeteme solo ma si’i lou to’oto’o  i  luga.
  • Tutu’i  le i’u o le to’oto’o  i le va o le vaematua  male tama’ivae  o le vae tauagavale, ma u’u  mau le to’oto’o ina ne’i pa’u.
  • E le fa’aaogaina le to’oto’o  lauga i totonu o le fale.
  • La’ei o le siapo male fusi  lau’a
  • Fa’alava le to’oto’o pea  fa’ai’u le lauga i malae.  Faalava i ou luma le fue pea fa’ai’u le lauga i fale.

Sau ia, o lea ua ma’ea  tapena  ou la’ei,  o lou To’oto’o ma lou Fue lea.  Tago laia i lau lauga ma alo i  ou

faiva.  Ia tu le ati ma mana  le to’oto’o(Ia  manuia  le Lauga).  ‘Aua ne’i  tulolo le fue.  O lona uiga  ia ‘aua

ne’i  pa’u,  pe avea,  pe  to’ilalo le Lauga.

Alo laia i ou faiva o “Lauga  Samoa”;  o o’e o le Tulatoa, o le Tulafale, o le Susuga, o le Failauga ua iai

le atamai  i Lauga Samoa.  Mitamita o oe o le Samoa  moni,  ia tu ma lelea lau fetalaiga e puipuia ai lou

aiga,  nuu, itumalo,  malo, ma lau ekalesia.  O ou mama na.  A’o  ni  Sa’afi’afiga  na o le  Aganu’u  ma  Agaifanua  o Samoa.