“Lauga Samoa”  Faafetai  a Aiono ma le fanau  ona  o le alofa fa’aalia i lo matou taimi o le matuitui o le oti, i le vala’au paia a le Atua  ile Tina, le Afioga Falenaoti Malia Sosefina  Tuala Aiono Faalataitaua.

A’e  oute le’i  pa’i i le vai ole Malietoa nai le Tuamasaga na momo’o iai le tupu,  oute faapoipoi lili’a faa  la’au tuvanu  i ou Sa ma Faiga.  E faigata oe Samoa  o le Ao Mamala i le fa’asouga o ao ma le atu-folasa   I le paia maualuga o  ou Lumafatoto ma Papatuloto  i le afio alii Faatui ma  To’oto’o,  mamalu o le Faleagafulu ma Maopu,  le paia i leUsoga  a Tumua  ma Pule,  Tama ma Aiga,  Aiga ile Tai male Vaa o Fonoti.  Le paia maualuga ile susu o faa-Feagaiga Taulagi o loo tatalo  mo se  manuia  o Samoa nei  ma ielua.  O ou paia na Samoa ua nu’unu’u  atu fa’atini o tausala.  Taeao o le atunuu, taeao  o puapuaga;  taeao o le talalelei ua tatou sa’o i ma’omalie ae o’ao’a i faleseu.  Tulou, tulou, tulona  lava.

Ua fano nei le ata o le fetu na ta’i ina ua faautu i tuafanua le tagi ale manu lagi, aua ua ifo i manu ae mapu i vaimalie, ua tuloto ai nei au i le vaigalu ona o le ulufia o ou a’ao i lou alofa tula’i.  Ua mafua ai ona saua oe i peau o le ala, a’e le fefe ai le alofa. Ua taoto peau o le atu ava ae faaifo manu i Foga’a ua gafoa ata o manu sa mo’omia

A’e faapito augafa se leo e avea ai lenei avanoa  e momoli atu i le agaga o’otia le faafetai tele ona o le

agalelei ma lou alofa faaalia i o matou taimi o le matuitui ma le loto nutimomoia ona o le valaau paia ale Atua i le Tina, Afioga Falenaoti Malia Sosefina Tuala Aiono Faalataitaua

E momoli atu le faafetai i susuga i faafeagaiga,  lau susuga  Rev. Mark male Faletua faapea le Ekalesia Metotisi i Ft Lauderdale,  Florida mo ulua’i sauniga  o le Tina. Faafetai  le Susuga le Sea Taulafo ma le Ekalesia Metotisi  Fagatogo, Tutuila mo toe sauniga o le Tina.

Faafetai  tele  Father  Pope TualaTaetafe faapea  Father Kolio Tumanuvao mo le misi sa paia o le Tina.  Faafetai  lau susuga  le faifeau Lui AhFook  Afoa, ekalesia  Molimau a Ieova,  Auckland, New Zealand.  O Afioga Paia ale Atua  sa outou folafola ma manavaina, le upu faau’uina ma le faaolataga a Iesu Keriso ua avea ma faamama avega i agaga mafatia,  a’o se oso lea o leTina ile feiloaiga ma lona Alii o Iesu Keriso .  Faafetai, faafetai  tele.

E momoli la’u faafetai  tele i o’u Aiga Tupu;  Aiga sa Malietoa, lau Susuga Papaliitele Falatugatuga male Faletua  Fauea  Gail Alailima, lau Susuga Papaliitele Faasiu ma Galumalemana  Steven  Kelly, lau afioga le aloalii Galumalemana  Vaiinupo faapea le ma’ave faalupe o le aiga.

Faafetai i le Susuga Tutasi Aiga Leiataualesa, lau Susuga  Leiataualesa Leuafaalanu,  Leiataualesa  Marie, Leiataualesa  Turner, Leiataualesa Laufasa, ma Leiataualesa Falefatu.  Faafetai lau susuga Mataafa Feula.

Faafetai i lau afioga Puailoa T. Ma’ae ma le faletua  Sasamamao Peseta i lou alofa faaalia ua maualuga ma matagofie ai le aso o le Tina.

Faafetai  Orepa Sooaemalelagi  ma Simati Lealiie’e,  Fiapito Lealiie’e male fanau mo taumafataga ma mea uma a’o iai Sosefina i Ft Lauderdale.

Faafetai  Tama Leao ma Luisa, Tama Jr. ma le Polynesian Show.

Faafetai  Peka ma Viavia Tiumalu male aiga.

Faafetai Mike Ulale ma Jim ma Ulu, uo ma aumea mamae.

La’u  faafetai tele i lo’u Paolo Tupu, le paia o le Aiga Satuala, le Aiga Faalagilagi na masaesae ai le lagi.

Lau Afioga Tuala Taetafe Kalolo, o le sa’o alii, tulaga o aiga lau Afioga Lauano, faapea lau fetalaiga

Vaifale ma le paia o le aiga i Maotasa.  Faafetai  tele i le afioga i le aloalii Afoa,Kilisi ma Sonny Stowers male aiga taulagi.

O le tatalo, ia alofa le Atua o manuia ia liligi faaua ana faamanuiaga  ia te outou ia le tasi ae sautualasi.

O’u Aiga Tupu, ma ou Paolo  Tupu faapea uo ma e na alolofa mai i le peau faamavae  o le Tina.  Ua faafetai  pele o feagaiga ua faamalo le agalelei, ua e faati’eti’e a’u i le ma’a salafa, lau teu lea, le fula, male mamala o lou alofa tula’i ua ou sapaia faatua  ele’ele.

O le a le paleina i lo’u ulu ina ne’i  lelea  i lematagi,  pe sei  foi i lo’u taliga ina ne’i  se’i  ‘ese tausala, pe ulaina i lou ua ina ne’i  momotu e se ulafa.

A’e o le a teu mau i le va o lo’u  mama  ma lo’u fatu.

O toe upu a Malietoa  ia Tuimanu’a  ina ole a taumavae .  Ua malie, ua malie, ua malie o.  Ua malie lau talo sa tu i le fusiloa, ua malie lau tolo sa tu i le paepaeloa.

Ua malie lau manu sa tu i le toa, ua malielau I’a sa ta’a ile vasa loloa aua o atu atoa ma atu o mitiloa.  Ua malie fo’i le matimati mai vasa aua o le ‘ava sa tu i le vaitina sa.  O le a fo’i Malietoa ma le mama ua lomi ma le va’a ua goto ua o’o i oa.

Lagi e mama le paia o aiga ae ola le tautalaga.  SOIFUA.

Aiono  Papaliitele Faalataitaua ma le fanau.